Laburbirak, euskarazko film laburren zirkuituak, 18. edizioa beteko du aurten euskal ikus-entzunezkoen harrobitik 8 laburmetraia Euskal Herriko hainbat aretoetara eramaten apirilaren 26tik maiatzaren 30era bitartean. Ordiziako Herri Antzokian emango zaio hasiera eta Larrabetzun amaituko da, tartean Bizkaia, Gipuzkoa, Araba eta Nafarroako hainbat herrietatik igaro eta gero. Zirkuituaren egutegia webgunean ikus daiteke.
Laburbirako antolatzailea den Johana Olabarriaren esanetan “Iazko pandemiaren ondorioz ikus-entzunezkoen grabaketa eta ekoizpen asko bertan behera gelditu behar izan ziren. Hala ere, badira kostata aurrera atera ziren lanak eta horiei oihartzuna emateko erantzunkizuna dugu Laburbiran”.
Gurekin batera hainbat herrietako elkarte eta udal sailek dena dute prest Laburbira berain herrietan hartzeko. Hauez gain, Eusko Jaurlaritzaren kultura saileko zein Arabako, Bizkaiko eta Gipuzkoako Foru Aldundien babesa izaten du zirkuitu honek.
Genero ezberdinetako laburmetraiak
Laburbira XVIII. edizioa 2019-2020an grabatu eta ekoiztutako euskarazko 8 film laburrek osotzen dute. Emanaldiak irauten duen 72 minututan ikusleak gorrotoa, barrea, beldurra, jakinmina eta nazka bizitzeko 
aukera izango du.
Jasotako film labur guztien artean 8 aukeratu dira beraien istorio eta kalitate nabarmenagatik eta jaialdietan izandako harreragatik. Hauetariko batzuk Zinebi (”Nigandik”) eta Mendifilm Festival (“Aterpean Ateri”) jaialdietan aurkeztutako lanak izan dira eta beste batzuk laburmetraia lehiaketetan sarituak izan direnak: HUHEZINEMA (“Babarrun Txapelketa”) eta Kameratoia (“Agur”).
Honako film labur hauek osotzen dute urte honetako Laburbira:
- Aterpean Ateri (Ruben Crespo)
- Nigandik (Imanol G. Gurrutxaga)
- Game Over (Ilune Diaz)
- Ilunabarrean esan (Ekhiñe Aizkorbe, Sara Alonso, Irati Egibar, Julene Etxauri, Xabier Villanina eta Irene Zaldua))
- Babarrun Txapelketa (Andoni Mtz de Madina eta Julen de la Serna)
- Datsegit (Aitor Arruti)
- Nire eguneroko maitea (Ximun Fuchs, Manex Fuchs, Eñaut Castagnet)
- Agur (Iñigo Acha)
Hauen inguruko informazio guztia eta herrien zerrenda Laburbira webgunean aurki ditzakezu.
Zuzendariekin solasaldian
Edizio guztietan bezala Laburbirak zuzendari hasiberri eta amateurren lanak plazaratzeko aukera ematen die, beharrezkoa duten bultzada emateko helburuarekin. Horregatik, lanak plazaratzeaz gain, 8 zuzendariek ikusleen aurrean euren burua aurkezteko eta grabaketa prozesua azaltzeko aukera izango dute.
Guztira 29 herritan zehar ibiliko da Laburbira baina solasaldiak ez dira emanaldi guztietan egongo. Laburbirako webgunean azaltzen dira emanaldien eta solasaldien zerrenda.