Irakurri, gozatu eta oparitu

Martxoaren 18an  hasi eta maiatzaren 31 bitartean gauzatuko da 13. edizio hau eta datorren urtean berrikuntzekin etorriko da, irakurleen joera eta behar berriak bere eginda. Jendea euskarazko liburuak irakurtzera animatzeaz gain, egitasmoak liburuak elkarri oparitzea edo trukatzea ere proposatzen du, harremanak lantzeko praktika gisa.

Hamahirugarrenez, herritarrak euskarazko liburuak irakurtzera animatuko ditu, irakurtzearen alde atsegina azpimarratuz eta liburutegi publikoen zerbitzuen erabilera  sustatuz. Horretarako, besteak beste, parte hartzea saritzen du egitasmoak, liburuak erosteko abantaila ekonomikoak emanez, eta liburua opari bihurtzera gonbidatuz.

 

Parte hartzeko pausoak

Kanpainaren izenak berak argi adierazten duenez, hiru pausu erraz emanda parte hartu daiteke:

  1. Lehenengo pausoa irakurtzea da, euskaraz irakurtzea, alegia. Horretarako, herriko liburutegi publikora joan, eta euskarazko edozein liburu maileguan eskatu ahal izango duzu.
  2. Liburua irakurri, liburutegira itzuli, eta fitxa erraz bat bete: zein izan den irakurritako liburua eta zer iritzi dugun. Fitxa hori beteta, liburuzainak erosketa-txekea emango digu, hitzartutako liburu dendan erabiltzeko.
  3. Azken pausua, liburua oparitzea da: lagun bati, senide bati, edo norbere buruari.

Liburutegian jasotako erosketa-txekeak, euskarazko beste edozein liburu  %35 merkeago erosteko  aukera  emango digu. Horrez gain, apirila eta maiatza bukaeran, liburutegi bakoitzean 30€ko  balioa duen txeke baten zozketa egingo da, hile horretan irakurle fitxa bete dutenen artean. Txeke berezi horrek, besteek bezala, euskarazko liburuak erosteko aukera emango du. Erosketa-txekeak liburu dendan erabiltzeko epea  ekainaren 15era artekoa izango da

Martxoaren 18tik maiatzaren 31ra 

Aurten honako herrietan gauzatuko da Irakurri, Gozatu eta Oparitu:

  • Araba:  Agurain, Asparrena, Dulantzi, Barrundia, Zigoitia, Gasteiz.
  • Bizkaia: Ondarroa, Ermua, Atxondo, Mañaria, Lekeitio, Zamudio, Igorre, Getxo.         
  • Gipuzkoa: Soraluze, Ordizia, Legazpi, Lazkao, Zaldibia, Beasain.
  • Nafarroa: Ultzamaldea, Lizarra, Sakana, Berriozar, Antsoain, Aranguren, Zizur nagusia, Malerreka, Iruñea, Noain, Gares-Puente La Reina, Esteribar, Leitzaldea eta Barañain

    

Eragin positiboa 

Aurreko edizioetan frogatu da kanpainak eragin positiboa izaten duela herritarrek herriko liburutegian egiten duten euskarazko liburuen mailegu kopuruan. Izan ere, egitasmoaren helburuetariko bat  horixe da, euskaldunak liburutegi publikoen erabiltzaile  bihurtzea. Era berean, ekimenak liburuen salmentan izaten duen eragina  kontuan hartzekoa da.

Irakurri, gozatu eta oparitu ekimenaren bueltan bestelako literatur jarduerak ere antolatuko dira, hala nola solasaldiak idazleekin, liburu azokak, irakurketa musikatuak eta abar. Egitasmoak honako argitaletxeen laguntza izaten du: Alberdania, Erein, Elkar, Ibaizabal, Pamiela eta Txalaparta.

2020an berrikuntzak

Egitasmoa tokian tokiko euskaltzaleen elkarteen, Udalen, liburutegien eta liburu denden elkarlanari esker burutzen da, eta herrietako eragileen arteko harremanetarako tresna izan nahi du. Hamahiru urtez eman duenarekin oso pozik gaude eta, hain zuzen, horregatik, Irakurri Gozatu eta Oparituri bultzada berri bat emango diogu, irakurleen egungo joera eta beharrak bere egin ditzan. Hemendik aurrera ere herritarrak euskaraz irakurtzera tentatu ditzagun.

 

14 comments for “Irakurri, gozatu eta oparitu

  1. Barclays
    2017/02/22 at 23:03

    Asko gustatu zitzaidan eta oso ona da.

     

Utzi erantzuna

Zure e-posta helbidea ez da argitaratuko. Beharrezko eremuak * markatuta daude