Apirilaren 1ean abiatuko da “Irakurri, gozatu eta oparitu” egitasmoaren 10. edizioa 50 herritan

igo_aurkezpena

Patxi Zubizarreta, Belen Garulo, Karmele Jaio eta Manuel Moreno

Apirilaren 1ean jarriko da martxan aurten Irakurri, gozatu eta oparitu egitasmoa, irakurzaletasuna sustatzeko gero eta herri gehiagotan egiten den egitasmoa. Hamargarren edizioa izango da aurtengoa eta beste urte batez euskaltzaleen topaguneak, udalak, liburutegiak eta liburu dendak elkarlanean arituko dira. Egitasmoa apirilaren 1ean hasi eta maiatzaren 31rarte egongo da martxan.

Egitasmoak hainbat berrikuntza izango du aurten, inportanteena, Patxi Zubizarreta idazleari eskaturiko 50 liburu gomendatuen zerrenda izango da, 5 adin tartetan aurkeztuko dena.

Gainera, azken bi edizioetan izandako hedapenak jarraipena izango du aurten eta 50 herrietan ipiniko da martxan, iaz baino 9 gehiagotan eta duela hiru urte baino 26 gehiagotan, %100 baino gehiagoko igoera.

Irakurzaletasuna bultzatzea helburu duen egitasmo honek herritarrak euskarazko liburuak irakurtzera animatu nahi ditu, irakurtzearen alde atsegina azpimarratuz eta liburutegi publikoen zerbitzuen erabilera sustatuz. Egitasmoak, parte hartzea saritzen du, liburuak erosteko abantaila ekonomikoak emanez, eta liburua opari bihurtzera gonbidatzen du.

Egitasmoa tokian tokiko euskaltzaleen elkarteen, Udalen, liburutegien eta liburu denden elkarlanari esker gauzatzen da, eta herrietako eragileen arteko harremanetarako tresna izan nahi du.

Kanpainaren izenak berak argi adierazten duenez, hiru pausu eman behar dira bertan parte hartzeko:

  1. Irakurri. Lehenengo pausoa irakurtzea da, euskaraz irakurtzea, alegia. Horretarako, herriko liburutegi publikora joan, eta euskarazko edozein liburu maileguan eskatu ahal izango dugu.

  2. Gozatu. Liburua irakurri, liburutegira itzuli , eta fitxa erraz bat bete beharko da: zein izan den irakurritako liburua eta zer iritzi dugun. Fitxa hori beteta, liburuzainak erosketa-txekea emango digu, hitzartutako liburu dendan erabiltzeko.

  3. Oparitu. Azken pausua, liburua oparitzea da: lagun bati, senide bati, edo norbere buruari.

Liburutegian jasotako erosketa-txekeak, euskarazko beste edozein liburu %35 merkeago erosteko aukera emango digu.

Bi hilabetez martxan, apirilaren 1etik maiatzaren 31ra.

markatzailea_bApirilaren 1ean abiatuko da “Irakurri, Gozatu eta Oparitu”ren 2016ko edizioa, eta maiatzaren 31n amaituko da. Hortaz, bi hilabeteko iraupena izango du kanpainak liburutegietan, baina erosketa-txekeak liburu dendan erabiltzeko epea ekainaren 11 artekoa izango da. Aurten, egitasmoa udaberriko hilabeteetan zentratuagoa egongo da, alde batetik, liburutegietan garai hobea izaten delako, eta bestetik, liburu-opari eta trukeen dinamika, oporrak bitarteko hilabetetan garatu ahal izateko.

Esan bezala, aurten 50 herritan izango da martxan ekimena eta nabarmentzekoa da, horietako hainbatetan lehenengo aldia izango bada ere, iazko herri gehienetan eskainiko dela, egitasmoaren eraginkortasunaren balorazio onaren adierazle.

Araba: Agurain, Aramaio, Asparrena, Barrundia, Dulantzi, Kanpezu, Legutio, Maeztu, Urizaharra, Urkabustaiz, Zigoitia, Zuia.

Bizkaia: Atxondo, Balmaseda, Derio, Ermua, Gernika-Lumo, Getxo, Igorre, Larrabetzu, Lemoa , Mañaria, Muskiz, Ondarroa, Otxandio, Zaldibar, Zamudio.

Gipuzkoa: Lazkao, Legazpi, Mutriku, Soraluze, Oñati, Ordizia, Orio, Zaldibia.

Nafarroa: Altsasu, Antsoain, Aranguren, Arbizu, Atarrabia, Basaburua, Berriobeiti, Berriozar, Burlata, Irurtzun, Etxarri-Aranatz, Lakuntza, Larraun, Lizarra, Olazti, Uharte, Urdiain, Zizur Nagusia .

Aurreko bederatzi edizioetan frogatu denez, kanpainak eragin positiboa izaten du herritarrek herriko liburutegian egiten duten euskarazko liburuen mailegu kopuruan. Izan ere, egitasmoaren helburuetariko bat horixe da, euskaldunak liburutegi publikoen erabiltzaile bihurtzea. Era berean, ekimenak liburuen salmentan izaten duen eragina kontuan hartzekoa da.

Irakurri, gozatu eta oparitu ekimenaren bueltan bestelako literatur jarduerak ere antolatuko dira, hala nola solasaldiak idazleekin, liburu azokak, irakurketa musikatuak eta abar. Egitasmoak honako argitaletxeen laguntza izaten du: Alberdania, Erein, Elkar, Ibaizabal, Pamiela, Txalaparta eta Susa.

Urtero moduan hainbat Udal eta Mankomunitate, Nafarroako Foru Gobernua eta Eusko Jaurlaritzaren kultura sailak zein Araba eta Bizkaiko Foru Aldundiek babestuko dute egitasmoa.

Kartela_OROKORRA_bajan

3 comments for “Apirilaren 1ean abiatuko da “Irakurri, gozatu eta oparitu” egitasmoaren 10. edizioa 50 herritan

Utzi erantzuna

Zure e-posta helbidea ez da argitaratuko. Beharrezko eremuak * markatuta daude