Ostiralean hasiko da Udagoieneko Ostera

Udagoieneko Ostera kultur zirkuituaren 13. edizioa ostiral honetan hasiko da, Elorrion. Esan genizuen bezala, sei emanaldi izango ditugu aurten, Bizkaiko hainbat txokotan:  Elorrio, Zalla, Bilbo, Igorre, Leioa eta Muskizen.

UDAGOIENEKO OSTERA. Errimak Oinetan

Lehen ikuskizuna, Haatik dantza konpainiaren ERRIMAK OINETAN izango da, Elorrioko Arriola Antzokian (azaroak 2, 22:00). Sarrera BBKko kutxazainetan zein aretoan bertan eskuratu dezakezue, 8€-tan. Dantza eta bertsoa uztartzen dituen ikuskizun paregabea da, zin egiten dizuegu!

“Bertsolariek sentipen eta emozioak harilkatzen dituzte entzuleengan. Baina entzule horiek dantzariak balira? Nola adieraziko lukete belarrietatik jasotako zirrara errimatua oin puntetan menperatzen duten dantzaren bidez? Galdera horren erantzuna da “errimak oinetan”, bertsolaritza oinarri duen dantza emanaldia. Haatik dantza konpainiak jarri ditu oinak errimetan eta errimak oinetan. Dantza berriak, bertsoei jarriak.”

Baina azaroaren 30era bitartean beste bost ikuskizun ere izango ditugu. Izan ere, programak euskarazko formatu handiko kultur produkzioa hurbiltzen du Bizkaiko antzokietara, aisialdian euskaraz gozatzeko aukera eskainiz. Horretarako, dantza, musika eta antzerkia oinarri dituzten ikuskizunak antolatu ditugu, publiko mota guztien beharretara egokituta.

Hona hemen gainontzekoak:

Azaroak 16, ostirala. Zallako Zine Antzokian, 20:00etan. Sarrera 12€

  • BENITO LERTXUNDI: Orioko bardoak udaberrian kaleratu zuen bere azken diskoa, “Oroimenaren oraina”. Askatasuna, maitasuna, damua, heriotza… kantu bihurtutako galderak biltzen ditu Ez Dok Hamairuren sortzaileak bilduma honetan. Bere hitzetan, lan xumea da oraingoa, baina “gauza xume guztiak dira sakonak”. Kantu horiek, eta betikoak, bere “Bizkaia maitean” izango ditugu azaroaren 16an.

 

Azaroak 22, osteguna. Bilboko Kafe Antzokian, 21:30ean. Sarrera 8€ aldez aurretik, 10€ egunean bertan

  • BETAGARRI: Gasteizko musika taldeak 20 urte daramatza Euskal Herriko plazetan. Oraingoan disko berriarekin helduko da Bilboko Kafe Antzokira, “Zorion argiak” izenburupean, kaleratu baino bi egun lehenago. 23 abesti, rock, ska eta reggae doinuekin. Diskoan zenbait gonbidaturen laguntza izan dute, Pirritx eta Porrotx, Mikel Urdagarin edo Garirena, esaterako. Sarrerak hemen.

 

Azaroak 23, ostirala. Igorreko Lasarte Aretoan, 20:00etan. Sarrera 6€

  • LINGUA NABAJORUM: “Euskararen Historia bi Txoriburuk Kontatua” (Mikel Martinez, Patxo Telleria). Teoria liluragarri bat defenditzen dute: Herri honetan gertatu den gatazka bakoitzari hizkuntzaren aldaketa bat dagokio. Hasieran, gure Herria paradisu bat zen, non bikote bakar bat bizi zen. Mundu estatiko eta baketsua zen, eta nahikoa ziren onomatopeiak, inguruko animaliak eta agerraldi naturalak deskribatzeko. Semealaben etorrerarekin sortu zen Euskal Gatazka, orain arte iraun duen fenomenoa.

 

Azaroak 24, larunbata. Leioako Kultur Leioan, 21:00etan. Sarrera 10€

  • RUPER ORDORIKA: “Hodeien azpian” eta sasien gainean, Ruper Ordorikak bere azken diskoa plazaratuko digu. Hitzen xalotasuna eta benetakotasuna, sinbolismotik eta soberazko lirismo edota nostalgiatik urrun; doinu, sonoritate eta kantaeraren giro egokia eta gardentasuna; poesia eta kantua, kantua eta poesia, sentsibilitate handiz eta indarrez, ederki uztartuak…

 

Azaroak 30, ostirala. Muskizeko Meatzari aretoan, 20:00etan. Sarrera 6€

  • HIL ARTE BIZI: Antzezlan hau adiskidetasunaren mugen inguruan egiten den hausnarketa bat da. Nacho, Angel eta Maria. Bi gizon eta emakume bat eta jakina… gutxienez pare bat maitasun istorio. Hiru lagun, betiko lagunak, betirako lagunak… edo ez. Hil arte bizi heriotzaz hitz egiten duen komedia eta adiskidetasunaz jardungo den tragedia da. Bizitzeko gogoaz ari den tragikomedia.

Sarrerak BBKren orotarioko kutxazainetan zein aretoetan bertan eskuratu ditzakezue. Udazkenero, astero ostera hasten da!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude